Кӑрлачӑн 17-мӗшӗнче Паваркасси культура ҫуртӗнче В.С.Степановӑн «Манӑн юррӑмсем» пултарулӑх каҫĕ иртрĕ.
Василий Степанович чуна тивекен 250 юрра яхӑн чĕре витĕр кӑларса хут ҫине куҫарнӑ. Кашни йĕрки, сӑмах ҫаврӑнӑшĕ – ытарайми. Шухӑшлавĕ – тарӑн. Унӑн юррисем этемĕн шалти туйӑмĕсене уҫса параҫҫĕ, чĕрене пырса тивеҫҫĕ. Василий Степановича «тӑван тавралӑх юрӑҫи» тесе калатпӑр. Унӑн юррисенче ҫут ҫанталӑк илемĕ, тӑван ял чапĕ, мухтавлӑ Чӑваш ен, Раҫҫей мӑнаҫлӑхĕ.
Уявра пултаруллӑ поэта тата композитора ӗҫтешĕсем, Паваркасси шкулĕнчен вӗренсе тухнисем, ял ҫыннисем саламларӗҫ.
Василий Степанович хайланӑ юрӑсене «Кӑмӑл» ансамбль, Чӑваш патшалӑх юрӑпа ташӑ ансамблĕн солистки Елена Леонтьева, «Ямаш» халӑх фольклор ушкӑнĕ, Медикасси культура ҫурчĕн ĕҫченĕ Лина Спиридонова, Паваркасси шкул вĕренекенĕсем шӑрантарчĕҫ.
Куракансем концертра янӑранӑ юрӑ-кĕвве итлесе киленчĕҫ.